Направив пауза, простете што не објавував, но после крвавиот четврток во Македонија, ми требаше време да се соземам, време да бидам со мисла, душа и срце, таму! Таму, дома.
Денес се враќам на рецептите, со надеж дека мојата Македонија конечно ќе зачекори по правиот пат <3
Фотографиите не ми се од сега, обично ова слатко го правам подоцна, зашто сеуште јаготките кои ги сакаме не се појавени.
Но да го започнеме враќањето со нешто благичко.
Состојки
- 1 кг јагоди
- 1кг шеќер
- 1-2 парчиња лимон – лимонов сок
Постапка
- Количината за слаткото сами ја одредувате, на 1 кг. јагоди оди 1 кг шеќер. Исчистете ги јагодите, измијте ги убаво и оставете ги најмалку 3 часа да одстојат во вода во која има лимонов сок.
- Потоа исцедените јагоди редете ги во тенџерето за варење, еден ред јагоди, па шеќер и се додека има, зависи од количината.
- Треба да се вари на силна температура со постојано протресување, но не повеќе од половина час. Се прави пена која треба да ја отстранувате, си знаете.
- Кога е готово, покријте го со влажна платнена салфетка да одстои цела ноќ.
- Наредниот ден, зовријте го 10 тина минути повторно и ставете го во подготвени врели стерилизирани теглички. Јагодите ќе останат цели, а и не потемнуваат.
Се служи на старински начин, а се јаде пребрзо зашто е преубаво 🙂
Ова слатко ми значи многу, беше вратата низ која влегов на Coolinarika, а ми ја отвори Лилјана Илиева на што сум и бескрајно благодарна.
Слаткото навистина е преубаво, само да имате јаготки со вкус, а не јаготки кои се како пластични. И да немате слабост за сликање слатка како мене, сум направила стотици фотки 🙂
Добар апетит!
