И ете ја нашата традиционална дроб сарма позната како џерп сарма во старите времиња, а и денес кај најстарите Струмичани кои раскажуваат за убавите времиња.
Не знам како ја прават другите семејства во Струмица, но кај нас се прави вака, а не со јајца полиена како во други краеви низ Македонија.
Традиционално ја правиме за Прочка, иако во опција се и други јадења…
Она што беше најважно во минатото, а би требало да е и денеска, е дека помладите одат кај постарите на барање прошка. Сите млади семејства одат кај своите родители, а и блиски роднини да побараат прошка, така останало…
Кај родителите се оди на свечен ручек…Кога бев мала, редовно одевме кај баба ми и дедо ми, па кадаифот, дроб сармата и лацкањето јајца, уште ги памтам.
Потоа одевме кај моите родители, а лацкањето јајца се повеќе замираше, знаете тоа е кога на децата им се пуштаат варени јајца да ги амкаат…
Не знам дали амкање се викаше литературно? Како е правилно, не знам, ама вакви убави адети треба да ги преживеат сите турбуленции, сите премрежија и модерни времиња.
Секако си е убава дроб сармата, рецепти и варијации има, а само љубов треба за да се направи.
Состојки
- јагнешки џигер
- марамица
- неколку страка младо кромитче
- 1 морков
- 1 филџанче за кафе ориз
- може бел џигер и други изнутрици, но мене ми е поубаво така, само џигер
- мирудии или сушено нане и магданос
- сол, црн бибер, црвен пипер, буковец и сушен зачин
- зејтин
Постапка
- Го пржите кромидот и морковот на ситно исецкан.
- Во друга тава го пржите џигерот на коцки, па ги соединувате, додавате ориз и зачините. Оризот и кромидот може ако сакате да ви постојат во зовриена вода малку, поклопени, ако правите прв пат, за да се осигурате дека ќе биде сварен, инаку не треба…
- А потоа скроената марамица на парчиња како за да виткате сарми ја ставате во млака вода за полесно да виткате…
- Секое парче го ставате во чорбалка, голема лажица за чорба. Ставате и полните од филот, па правите топка убаво зтворена одоздола.
- Ги печете покриени, во водичка и црвено пиперче, на тивко, а на крај откријте за да фати убава боја и одозгора.
- Инаку џигерот секогаш го чувам во млеко пред готвење, па и марамицата ја ставив…
За оние кои имаат проблем со изнутрици, млекото помага мирисот да биде ублажен. - Се пече на тивко, марамицата да се истопи колку е можно повеќе и да се зацрвени.Морам да кажам дека се изнамачив да најдам сé ова на почетокот, бидејќи не се готват такви работи овде. Имав среќа, зашто дури и да има некаде во Балкански продавници, веднаш се продава. А сега најдов начин коначно, директно во кланица…
Се сервира со кисело млеко, младо кромитче и салата. Се јаде топло 🙂
На здравје !