Пржено сирење

 

За сите кои не постат, едно преубаво саботно јадење, брзинско, а вкусно.

Инаку денес е Тодорова сабота, ден кога момите и ергените се аресувале на овој ден, порано!
Сите се излезени на пазар, а младите си флаат око, се бендисуваат, стара традиција која се одвивала на Корзото во Струмица. Девојчињата стоеле пред Градската аптека, а момчињата на скалите на Градскиот Одбор… И од сите околни села на тој ден доаѓале да се аресат.

Мене ми е баш криво што не знам ниту една лична приказна за љубовта на прв поглед од тој ден…
Денес не се практикува тоа, но приказната се пренесува од колено на колено, и иако со малку потсмев, како да никој не верува во тоа, сепак има многу пораки за љубов во неа …
Се послужив со текстот од кај Николина Јакимовска каде детално е објаснето за празникот.
Еве еден дел за обичаите од мојот крај:

“Вакви обичаи забележал и М. Цепенков: „Во петок вечер спроти Тодороа сабота, кое девојче сака да си го види на сон кое момче ќе си го земи за маж да је биди, еве како ќе напраи: ќе седни да вечера и првијо залак што ќе го сожвакат, нема да го голтни, ами ќе го изваи од уста и ќе го чуа за коа ќе си легни да го клаи под перница. Спиејќи над залаго, ќе и` дојде тоа момче што и` је наречено за да ја земи. Ако види некое момче што го знаи, него ќе го земи бездруго, а пак ако види некое непознато, непознатото момче ќе го земи.“ Сличен на овој обичај М. Цепенков забележал и во Битола: „Во град Битола спроти Тодорица праат мајките на ќерките еден маривет да познаат кое момче ќе и` ја земи ќерката. Ќе појди една мајка в црква и ќе земи три зрна пченица, падната што има наземи. Коа ќе седнат да вечераат, ќе и` го укради мајката на ќерката првиот залак и коа ќе си легни девојчето да спие, ќе и` клаит под перница. Спиејќи, девојчето, ќе го сонуала кое момче ќе го земела, убао ќе го видела, очи со очи ќе се виделе и бездруго тоа момче ќе го земела. Утрото со душа ќе ја чекат мајка е да стани од спиење за да ја праша што сон сонуала. Ако е страмежливо некое девојче и неќи да е кажи на мајка си, таа ќе и` нагодуа за соно што го видела и за момчето што го видела. Ете од трите зрна пченица и еден залак леб, клаени под перница ќе си го виделе на сон кое момче ќе земи. Ако е вистина ашколсун јас ќе му речам.“
Д-р Марко Китевски,
Научен соработник во Институтот за македонска книжевност
И навистина така нешто правевме, правеше и Ива, возбуденоста е голема, тврдењата некогаш може да се и реални, убави девојчински и момински соништа…

Да се вратиме на рецептот 🙂

 

Состојки

  • попосно сирење
  • брашно
  • зејтин

Постапка

  1. Сирењето се сече по желба, но немојте тенки парчиња, тие веднаш се деформираат.
    Се става во брашно и се пржи на загреан зејтин.
    Потоа температурата се регулира за да не изгори веднаш брашното.
  2. Се врти и од другата страна, најдобро е по еднаш за да не се расипе парчето.
    Значи почекајте да се испржи од едната, па дури тогаш свртете го.
    Ако ви се разлее, присоберете го како парче и кога ќе се испржи, превртете го или едноставно ставете јајце врз него, секако ќе биде убаво.

Масните сирења потешко се пржат, но ете и за нив има мајстори како татко ми. Сите кои пробале, знаат, а многумина пробале. Омиленото јадење на мајка ми, татко ми го прави најубаво на свет, за појадок, за вечера, за ручек.
Го јадеме во разни комбинации, најчесто со јајца и пиперки.

Пријатно!

Loading Facebook Comments ...

Напишете коментар