Овој рецепт ми беше многу актуелен порано, а сега го зачестив повторно. Баба и на Ива го правеше прекрасно, стар струмички специјалитет, да не го заборавиме.
Вообичаено правам посна боранија, а ако веќе треба да е со месо, вака најмногу ми се допаѓа.
Состојки
- 400 гр жолта боранија
- 500 гр мелено мешано месо
- млеко
- пиперка
- морков
- кромид
- лук
- сува пиперка
- сол,сушен зачин,црн пипер,црвен пипер
- зејтин
- магданос
Постапка
- Испржете го најнапред месото и тргнете го настрана.
- Потоа испржете го кромидот, пиперката, морковот, лукот.
- Додадете ја и боранијата, свртете ја неколку пати.
- Ставете го и месото, нека заедно се пропржат.
- Сега ставете ги зачините, сувата издробена пиперка и млеко во висина на боранијата, исто како што ставаме вода.
На боранијата не треба да и ставаме многу вода, туку по малку, постепено да додаваме.
Така и млекото. Млекото го мешам со малку вода. - Се динста на тивко додека да се свари боранијата.
- Се додава магданос, буковец…
Битно е да не се превари, зависи од боранијата, ќе пробате…
Боранијата секогаш ја сервирам со кисело млеко.
Пријатно!
