Правам најразлични ролати од месо, за гости ми е најубав ручек, односно за празници, баш е свечен ручек.
Одлично се вклопува дури и во некои диети, комбинацијата ви ја препорачувам 🙂
Состојки
- свинско филе
- неколку цветови карфиол
- црвена пиперка
- сува пиперка
- морков
- лук
- маслиново масло
- сол, црвен пипер, црн пипер, сушен зачин, триена сол
- рузмарин
- кашкавал
- печурки
Постапка
- Пиперките, карфиолот, морковот и лукот се подваруваат со капка маслиново масло и водичка.
- Потоа се цедат, се миксираат со сол и зачини по вкус, црвен пипер, црн бибер, триена сол..
- Месото се отвара, обично го сечам два пати и е доволно за ролат. Значи се засекува од десно една третина, па се отвара на лева страна, а десната се засекува од средина и се отвара како книга.
- Се посолува со зачини, се става рузмарин повеќе.
- Се ренда кашкавал.
- Одозгора се става од пасираниот зеленчук како фил и врз него кашкавал во средина.
- Се витка и се врзува со конец да не се отвори.
- Се пржи на грил тава премачкана со маслиново.
Се сече, се вади конецот и се сервира со филот од зеленчук и печурки, но вие можете и со ориз, компир, по желба.
Месото треба да остане сочно внатре, да не се исуши, не му треба долга обработка на свинското филе. Печурките едноставно испечени на грил тавчето, може со лукче и рузмарин да се прелијат.
Преубав рецепт, го бев заборавила, а баш ми е префинето јадење и баш убаво сум искомбинирала. Пиперките му даваат преубав вкус, а за кашкавалот го знаете ефектот.
Е сега сум била полна суви пиперки тогаш и од нив сум ставила, ама и триената сол ми била актуелна 🙂 Е не морате вие, но јас кога ги имам, обавезно ги користам, посебен вкус се добива! Пробајте, ем декоративно, ем здраво 🙂
Пријатно!
П.С. Ете, и кога се работи за здраво јадење, мене прво ми е битно дали е вкусно, е потоа може да биде и здраво. Ако не е, има начини како да си го дотерате по ваш вкус, ова е само една варијанта.
Овде може да видите сличен рецепт. И овде, иако овие се печени, сепак се ролати.
