☙ ❤︎ KOGA DAVAME HRANA, DAVAME LJUBOV I OBRATNO! ♡ BLOGOT E POSVETEN NA MOJATA IVA ❤︎ ❧
Еве една старинска тава која ја имам во две варијанти, едната е со кромид, другата со лук.
Таа со лук баба и на Ива ја викаше нероврсто, така и мене ми остана, ќе ставам рецепт друг пат.
А денес со кромид, преубава тава која и баба ми и моите ја правеа, па и јас, секој со свои мали измени…
Можете да ја направите со која сакате риба, јас ја правев со пастрмка овој пат, ако рибата е без трње, без коски, поубаво е.
Реков дека сувите пиперки ми станаа главна состојка, главна храна, секогаш во комбинација… Едноставно ги обожувам.
Јас сум Македонка, верувам и во едни поинакви креации на храната, верувам во трансформацијата на храната, за да не се фрла, за да се искористи максимално, а да се создаде превкусно јадење!
Трансгенерациска порака 🙂
Често моите оброци се токму такви!
Кога ќе остане од оброкот, предизвик ми е да направам комплетно ново јадење.
Токму така настана и оваа јадење, инспирирано од традицијата.
Рецептот за тараната може да го видите овде, доколку ве интересира.
За сите кои не постат, едно преубаво саботно јадење, брзинско, а вкусно.
Инаку денес е Тодорова сабота, ден кога момите и ергените се аресувале на овој ден, порано!
Сите се излезени на пазар, а младите си флаат око, се бендисуваат, стара традиција која се одвивала на Корзото во Струмица. Девојчињата стоеле пред Градската аптека, а момчињата на скалите на Градскиот Одбор… И од сите околни села на тој ден доаѓале да се аресат. Продолжи со читање “Пржено сирење”
Жал ми е што немам големо искуство со сувите пиперки, најолем дел од животот не сум ги користела, затоа сега гледам да надокнадам. Традициите во моето семејство бараа поинакво подготвување на пиперките. Баба ми сушеше домати, но не се сеќавам на пиперките, моите родители не сушеа и не купуваа, а јас негде од 2000 година им се посветив.
Револуционерна година за техниката, а за мене враќање кон корените за пиперките 🙂
Од досега пробаното, потпечени, варени, пржени, најмногу ми се допаѓаат пржени во малку брашно. Па и потпечени во брашно.
Еве едно брзо приготвување, вкусот не може да ве остави рамнодушни! А тек мирисот, ммм…
Уште сме кај компирот… Еве една преубава комбинација со праз 🙂
Денес во Струмица е Тримери, ден кога се оди кај армасаната девојка…
Текстот подолу го презедов од Интернет.
Јас само би додала дека кај армасаната порано одеа и во вторник навечер кога беа карневалите. Армасаната девојка треба да го препознае својот маскиран армасник меѓу сите што дошле, па така се случуваат многу анегдоти, има многу радост и смеа…
Не знам дали уште се практикува тоа, зашто сега редоследот на работите е поинаков или грешам…
Сé започнуваше со детскиот карневал на Прочка. Потоа чист понеделник и бел грав, па во вторник вечер карневалот, посета на армасницата и во среда Тримере, ручек кај армасаната…
Не знам како се сега адетите, зашто се додаде маскенбалот кој е од поново време во сабота или петок и се изгубив веќе, кога што беше…
Немам Интернет оваа недела, пишувам од кафетерија, набрзина, се извинувам за сите можни грешки, ќе поправам кога ќе можам.
Како и да е, оваа традиција сите Струмичани ја носиме во срце, пораснати сме со неа и на светот му покажавме што можеме.
Евлија Челебија пишувал за овие чудесни денови и ноќи во Струмица, а магијата ја знае секој Струмичанец.
Не сум била многу пати на Тримери, така испаднало, но од ум не ми излегуваат синиите покриени со бовчи, свилени и везени кои кријат прекрасни посни јадења…
Гравот и сармата се главни за тримерскиот ручек, покрај сите подолу наведени, ги готват мерфетлики жени, но начинот на кој се сервираат е за посебна пофалба.
Сета креативност доаѓа до израз, секоја година нешто ново, а сепак со сета почит кон традицијата.
Браво мои Струмичани! Продолжи со читање “Тримери-сарма со ореви”
И овој рецепт е едноставен, повеќе е комбинација, но треба да оставиме трага и за вакви едноставни јадења. Модрите патлиџани за нас Струмичани се присутни секогаш кога ги има, во најразлични комбинации…
Покрај дроб сармата, традиционално, правиме и кадаиф. Прочка без кадаиф не бива, велат.
Ама велат кога се старее, почнуваме да живееме во минатото и зборуваме само за минатото…
Точно е, како натежнуваат годините, така новото време, тешко ни паѓа. највиталните се прилагодуваат некако, но сигурно ова не е наше време!
Ова е време на младите, како што во мојата младост, наше беше времето… Продолжи со читање “Кадаиф”
И ете ја нашата традиционална дроб сарма позната како џерп сарма во старите времиња, а и денес кај најстарите Струмичани кои раскажуваат за убавите времиња.
Не знам како ја прават другите семејства во Струмица, но кај нас се прави вака, а не со јајца полиена како во други краеви низ Македонија.
Традиционално ја правиме за Прочка, иако во опција се и други јадења…
Она што беше најважно во минатото, а би требало да е и денеска, е дека помладите одат кај постарите на барање прошка. Сите млади семејства одат кај своите родители, а и блиски роднини да побараат прошка, така останало…
Кај родителите се оди на свечен ручек…Кога бев мала, редовно одевме кај баба ми и дедо ми, па кадаифот, дроб сармата и лацкањето јајца, уште ги памтам.
Потоа одевме кај моите родители, а лацкањето јајца се повеќе замираше, знаете тоа е кога на децата им се пуштаат варени јајца да ги амкаат…
Не знам дали амкање се викаше литературно? Како е правилно, не знам, ама вакви убави адети треба да ги преживеат сите турбуленции, сите премрежија и модерни времиња.
Секако си е убава дроб сармата, рецепти и варијации има, а само љубов треба за да се направи.
Овој ручек ми е еден од омилените во сабота, брзински, а многу вкусен и многу здрав.
Уште малку празот ќе ни биде главен, иако го имаме преку цела година и секогаш има место на трпезата. Но ќе го заменат многу други пролетни јадења, а тој секогаш ќе не поврзува со поладните денови.
Тешко ми е да ви давам прецизни дози, готвам за двајца, но и тоа не е адекватната мерка, зашто често ми е подготвено за презентација на блогот.
Мерките за вакви јадења мора сами да си ги пронајдете и прилагодите спрема семејството, првиот пат можеби ќе биде малку или многу, но следниот пат ќе знаете 🙂
